Azərbaycan Prezidenti bu dəfə dünyaya milli qürur dərsi keçdi
Azərbaycan Ordusu dövlətimizin qətiyyəti, xalqın iradəsi sayəsində döyüş meydanında qələbə yürüşünü uğurla davam etdirir, 30 ilə yaxın müddətdə dünya dövlətlərinin, nüfuzlu beynəlxalq təşkilatların icrasına laqeyd yanaşdıqları BMT Təhlükəsizlik Şurasının qərar və qətnamələrini icrasını təmin edir. Sentyabrın 27-dən Ermənistan silahlı qüvvələrinin hərbi təxribatlarına Azərbaycan Ordusunun qətiyyətli cavabı, əks-hücum əməliyyatları həyata keçirərək işğal altında olan torpaqlarımızı azad etməsi dünya dövlətlərinin, beynəlxalq təşkilatların diqqətini çəkməklə yanaşı, bir sıra sual doğuran, daha dəqiq desək, maraqlarına uyğun məsələlərə aydınlıq gətirilməsi istəklərini ortaya qoymalarına səbəb olur. Bu istəklərin həmin dövlətləri təmsil edən televiziya kanallarının, digər mətbu orqanların təmsilçilərinin qərəzli məlumatlarla “silahlandırılaraq” dövlətimizin başçısı İlham Əliyevlə müsahibələrdə öz maraqlarını suallarında ifadə etmələri diqqətdən kənarda qalmır. Əsas olan bu suallar deyil, Prezident İlham Əliyevin onları əsl diplomatik məharətlə səbir və təmkinlə cavablandırması, dünyaya bir daha tarix və hüquq dərsi keçməsidir. Azərbaycan Prezidenti hər müsahibəsində bu məqamı xüsusi qeyd edir ki, beynəlxalq münasibətlərdə hüquq problemi yaşanır, ən əsası, işğalçı dövlətin bu günə qədər BMT Təhlükəsizlik Şurasının qətnamələrini yerinə yetirməməsi cavabsız qalıb, təcavüzkara qarşı heç bir sanksiya tətbiq olunmayıb. Dövlətimizin başçısının hər müsahibəsi Azərbaycanın siyasi müstəvidə üstünlüyünün bir daha işğalçı Ermənistana və onun havadarlarına çatdırılması baxımından xüsusi əhəmiyyət kəsb edir.
Bu fikirləri AZƏRTAC-a açıqlamasında Yeni Azərbaycan Partiyası Siyasi Şurasının üzvü, “İki sahil” qəzetinin baş redaktoru, siyasi elmlər doktoru Vüqar Rəhimzadə bildirib.
V.Rəhimzadə diqqəti dövlətimizin başçısı İlham Əliyevin bu günlərdə Almaniyanın ARD televiziya kanalına müsahibəsinə yönəldərək bildirib ki, Azərbaycan Prezidenti bu dəfə dünyaya milli qürur dərsi keçdi. “Jurnalistin tarixdən xəbərsizliyi fonunda ünvanladığı qərəzli, Ermənistana dəstək ruhunda sualına cavabında dövlətimizin başçısı bildirdi ki, Dağlıq Qarabağın Azərbaycan üçün önəmi resurslarına görə deyil, əzəli torpağı olaraq milli qürur, ədalət, beynəlxalq hüquq məsələsidir. Cənab İlham Əliyevin dünya informasiya məkanında Ermənistan-Azərbaycan münaqişəsi ilə bağlı ardıcıl şəkildə dünyanın aparıcı KİV-ləri vasitəsilə beynəlxalq ictimaiyyətə münaqişə haqqında həqiqətləri çatdırması heç vaxt unudulmayacaq bir dərs, ən əsası bu günədək Ermənistana havadarlıq edən dövlətlərə ədalətsiz yanaşmalarının hansı dezinformasiyalara yol açdığının heç olmasa fərqində olmalarına çağırışdır. Təbii ki, bugünkü Azərbaycanı 1992-ci illərin Azərbaycanı ilə müqayisə etmək qeyri-mümkündür. Birinci Qarabağ müharibəsi dövründə Azərbaycan Ordusunun zəifliyi, torpaqlarımızın deyil, ayrı-ayrı siyasi qrupların maraqlarının müdafiəsinə xidmət etməsi bir çox uğursuzluqlara yol açmışdı. Ən əsası Azərbaycan haqqında məlumatsızlıq erməni yalanlarının ayaq tutub yeriməsinə meydan verirdi. Amma bu gün istər Ermənistan, istərsə də ona havadarlıq edən dövlətlər və beynəlxalq təşkilatlar belə bir mənzərənin yenidən yaşanmasının qeyri-mümkünlüyünün şahididirlər. Artıq indi dünya ictimaiyyəti bu günədək həyata keçirilən qərəzli təbliğata görə Azərbaycanın Dağlıq Qarabağ uğrunda onun malik olduğu potensiala görə deyil, beynəlxalq hüquq çərçivəsində ərazisi olduğu üçün mübarizə apardığını dərk etmək məcburiyyətindədir. Eyni zamanda, cənab İlham Əliyevin bəyan etdiyi kimi, bu, qürur məsələsidir”, - deyə Baş redaktor qeyd edib.
“Bu gün Prezident İlham Əliyev Müzəffər Ali Baş Komandan kimi həm hərb meydanında öz sözünü deyir, həm də müdrik və qətiyyətli siyasi lider kimi informasiya meydanında ölkəmizin mövqeyini müdafiə edir, haqq səsimizi bütün dünyaya çatdırır” - söyləyən V.Rəhimzadə bildirib ki, Almaniya auditoriyasına Azərbaycanın ədalətli mövqeyini, atılan addımların məntiqini bir daha tam aydın şəkildə çatdıran, hər bir sualın arxasında hansı qərəzin, marağın dayandığını çox yaxşı dəyərləndirən dövlətimizin başçısı Azərbaycanın yalnız ədalətin bərpası istiqamətində mübarizə apardığını əsaslı şəkildə bəyan etdi. “Baxmayaraq ki, almaniyalı jurnalistin “Sentyabrın 27-də müharibə başladı. Sizin “kim birinci atəş açdı” sualına cavabınız nədir” sualında onun qərəzli mövqeyi özünün aydın ifadəsini tapmışdı. Düşünürük ki, son bir ayda Azərbaycan-Ermənistan cəbhə xəttində yaşananlarla dərindən maraqlanan, ən əsası ədalətli mövqe ortaya qoymağa çalışan hər kəs kimliyindən, hansı dövləti təmsil etməsindən asılı olmayaraq, tarixi bilməsə də, baş verənlərdə kimin haqlı, kimin haqsız olduğunu, ən əsası, hərbi təxribatın kim tərəfindən törədildiyini dərk etmək və düzgün qiymətləndirmək imkanında olar. Dövlətimizin başçısı İlham Əliyevin son bir ayda müsahibələrinin hər birində bu suala dolğun cavab öz əksini tapıb. Eyni sualların qərəzli formada təkrar-təkrar səsləndirilməsi, eyni məqsədə xidmət edən yanaşmalar həmin mətbu orqanların təmsilçilərinə “adi” görünsə də, artıq qarşı tərəf bunların fərqində olmamış deyil. Amma Prezident İlham Əliyev səlis şəkildə, təkrar-təkrar təmkinlə bu sualları cavablandırır, Azərbaycan həqiqətlərini bir daha dünya ictimaiyyətinə çatdırır. Dövlətimizin başçısının müsahibələrlə, həmçinin səsləndirilən suallarla bağlı fikirlərini bir daha xatırlamaq istərdik: “Azərbaycan xalqı görür ki, mən bütün suallara necə lazımdır cavab verirəm. Onların səviyyəsinə də düşmürəm heç vaxt, necə lazımdır cavab verirəm və susurlar. Çünki cavab verə bilmirlər, deyirəm get güzgüyə bax. Sən bura gəlmisən bizi ittiham etməyə. Sual vermir, elə bil prokurordur, ittiham edir bizi. Sən kimsən ki? Jurnalistlərə mənim hörmətim böyükdür. Mən onlarla mülayim tərzdə danışıram, bundan istifadə edirlər”, - deyə V.Rəhimzadə bildirib.
Baş redaktor belə bir ümumiləşdirməni diqqətə çatdırıb ki, “Amnesty International” və “Human Rights Watch” kimi beynəlxalq hüquq təşkilatlarının da mövqelərində dəyişiklik nəzərə çarpması Azərbaycanın apardığı əsaslı, real həqiqətlərə əsaslanan təbliğatının nəticəsidir. O vuğulayıb: “Adı çəkilən təşkilatlar Ermənistanın Azərbaycanın Bərdə şəhərini kaset bombalarından atəşə tutduğunu təsdiq etdilər. Halbuki, almaniyalı jurnalist möhtərəm Prezidentimizlə müsahibəsində guya bu təşkilatların Azərbaycanın hüquq çərçivəsində qadağan edilmiş silahlardan istifadə etməsi ilə bağlı məlumatlarının olduğu iddia edilirdi. Artıq geniş şərhə ehtiyac duymuruq. Göründüyü kimi, təsəvvür reallıq kimi qəbul olunmaq dəyərində deyil. Təbliğat o zaman güclü, uzunömürlü, ictimai fikrə təsir imkanında olur ki, tarixi faktlara, həqiqətlərə əsaslansın. Azərbaycan Ordusu qələbə əzmi ilə bir daha Dağlıq Qarabağın Azərbaycanın ayrılmaz tərkib hissəsi olduğunu Ermənistana, ona havadarlıq edən dövlətlərə və beynəlxalq təşkilatlara sübut edir”.
